Паймымон дэри

Та ёросэ, кудӥз интыяськемын Элькунмылэн лымшорпалаз, кылдылӥз вуыльны трос пол пӧртэм делегациосын, но дыр ӧз сюрылы та юртэ вуылыны. Та радаз адӟонэ шупотытӥз. Нош ик ужрадэн Кизнере вуыса, мон дыр шедьтӥ вуылыны эмъяськон юртазы, кытын ужазы куто  эмъясь дэриез. Улӥсьёс мылзы потыса возьматӥзы мыным отчы сюрес. Тани мон вуи интыяз.

Та юрт матын интыяськемын вокзаллы но административной юртъеръёслы. Пырон дорын ик пичи гинэ автостоянка. Котыртэм азбарын  пушъё пӧртэм чебересь сяськаосын клумбаос. Писпуос пӧлын ватско пукон но шутэтскон интыос. Пырон ӧс азьын син азе усе пандус. Пырем бере  ик ӧс сьӧрын  пуке охрана, кудӥз юа - кытчы, кин доры пырӥськоды шуыса, гожья журналэ, собере гинэ пырыны лэзе. Озьыен татын порядок, малпай мон.

Кивалтӥсь эмчизы - Елена Ивановна Овчинникова паймиз, шӧдьтэк шорысь  вуэм кунолы, но дыр шедьтӥз интервью сётыны но  эмъяськонниез  возьматыны.

Эмъяськон юрт кылдэмын ёросысь огазеям шутэтскон юрт  урдсын, кудӥз ужаз 1953 арысен. Татын адямиос юнмато тазалыксэс, йӧнато ёзвиоссэс, суй-пыд но сюрлы висёнъёссэс.

Эмчиос ужазы куто инкуазь сётосъёсыз - эмъясь дэриез но эмъясь минерал вуэз. Мон трос пол выльысь но выльысь юалляй медицинской терминъёсты, малы ке шуоно валантэм вал. Елена Ивановна валэктӥз эмъясь дэрилэсь химической пуштроссэ. Озьы ик тодмо луиз мыным Кизнерысь эмъясь дэри химической  пуштросэзъя матын Литваысь Тенже но Москва ёросысь Татищевской шутэтскон юртъёсысь эмъясь дэриослы. Возьматӥзы но валэктӥзы мыным кызьы дасяло эмъясь дэриез. Нырысь ик сое пужныса пырто но сурало минерал вуэн. Бадӟым пуртыосын сое умой сурало, пырдыто комокъёоссэ, вутто кулэ луись темпетаруралы.

Кизнерысь эмъясь дэри кылдэмым 3000 арлэсь азьвыл. Со тырмоз  сю аръёслы. Али дыре соослэн  кутэмзы 3-4% гинэ.

 Эмъяны кутэм дэриез уже выльысь уг ни куто, сое сэрпалто,озьы кулэ эмъясь дэрилэн инструкциезъя. Инструкцияез дасязы Москваын, Удмурт Элькунысь Тазалыкез Утёнъя Министерстволэн куремезъя.

Мыным мылзы потыса возьматӥзы  эмъяськон кабинетъёсты (электроен эмъян кабинет, эмъясь дэри кабинет, эмъясь физкультура но мукет). Котькытын но туж чылкыт, борддоръёс бордын секытэн  ветлӥсьёслы кутӥськонъёс. Нуназе шутэтскон  дыр ке но вал, вань специалистъёс ужан интыосазы. Кивалтӥсь Елена Ивановна  данъяськыса вераз эмчиосыз сярысь. Эмчиоссылэн ваньмызлэн ик вань почетной званиоссы - "Тазалыкез утёнья заслуженной эмчи", яке "Удмурт элькунысь заслуженной эмчи". Озьыен таӵе ужасьёсын ушъяськыны луоз!

Удмурт Элькунысь улӥсьёс быгато эмъяськыны татын территориальной программая  дун тырытэк - квотаосъя. Со направлениосыз татысь келяло Элькунысь 46 эмъяськонниосы толэзьлы быдэ. Арлы быдэ татын юнмато тазалыксэс ньыль сюрслэсь трос висисьёс. Мон валай татын эмъяськон юрттэ тросэз адямиослы, озьы лыдъямъёсъя 94,2% висисьёз тупато тазалыксэз, 70% ужась адямиос тупато  ужан быгатонлыкъёссэс. Тросэз висисьёс кушто бодыоссэс но костыльёссэс.

- Нош кыӵе тӥляд эмъясь минерал вуды? - юай мон эмчиослэсь.

Вера валтӥсь эмчилэн нырысетӥ юрттӥсез  Людмила Анатольевна Шкляева:

-Кизнерысь эмъясь минерал ву - хлоридно-сульфатной, кальциево-магниевой, луоз шуыны Кизнерысь Нарзан (пальпотыса), - юрттэ эмъяны таӵе висёнъёс дыръя: ёзви но суй пыд висёнъёс, сюрлы висёнъёс, периферической вирсэр висёнъёс, невритъёс, невропатияос, мус но ӝуш висёнъёс но мукет.

- Нош эмъясь дэри но минерал вуэн эмъян сяна мукет амалъёсты вань на- а? - нош ик мон юай.

-Вань. Милям ужамы озьы ик кутӥсько пӧртэм мукет  амалъёс но:  эмъясь ваннаос, эмъясь физкультура, электро эмъян, легезьпуэн но етӥн кидысын паросъёс,эмъюмъёсын эмъян, массаж но мукет. Кема ӧвӧл басьтӥмы биохимической анализатор, кудӥз 2 минут куспын быгатэ дасяны анализъёсыз.Тужгес но тыршиськомы эмъяны инкуазь сётосъёсыз ужамы кутыса. Ваньзэ амалъёсты ӵош карыса, пайдаез эмъяськонлэн бадӟым  луэ.

-Нош татын эмъясько Удмурт Элькунысь гинэ-а?

-88% висисьёс лыкто асьме Элькунысь,кылемез  мукет шаеръёсысь.

- Умойгес луиз-а ужаны выльдытэм юртын?- юасько мон кивалтӥсь эмчилэсь.
- Ма веранэз! Ӵошатыса гинэ луэ валаны- 2006 арозь ми эмъяськомы вал ар куспын 1700 висисьёсыз, нош 2011 арын эмъямы 3700 адямиосыз, туэ  ньыль сюрслэсь трос луизы  ини. Ми туж бадӟым тау кариськомы Элькунысь азьмуртлы А.А. Волковлы, милемлы юрттэмез понна.

Солэн юрттэмез улсын милям эмъяськон юртмы выльысь вордскиз. 2008 арын эмъяськоннилэн  воштӥськиз быдэс материально-технической пуштросэз . Чылкыт, шуныт, чебер ужан интыос,таӵе  интыын ужам гинэ потэ. Ми яратӥськомы асьмелэсь ужмес, тыршомы юрттыны  висись адямиослы  юнматыны тазалыксэз, данъяны вордскем шаермес.

- Тау Елена Ивановна! Табере мон ваньзэ адӟи ас синмыным. Азинсконъёс тӥледлы!

Алексей Васильев